دمعة نار للعيد

دمعة نار للعيد
--------------------------------------------------------------------------------


باجر عيد ...؟
ملتمه الصحابه وتشتكيلي اتريد
باجر عيد ...؟
نلم حزن الليالي ونشتكي الآهات
كل يوم الاحزان اتجيب ثوب اجديد
وكل عيد اليمر واحنه ابهظم وبنوح
خلانه الوكت للهم مطاريد
باجر عيد ...؟

اتذكر كبل بالعيد مثل الطيف
هسه الطيف ضايع والكسر بالجيد
كبر بينه الجرح والحلم ضيعناه
ولجروح الخواطر مانفع تضميد
وحط بينه الوكت نيشان ماينزاح
دمعة نارتهمل ماتكف وتهيد
باجر عيد ...؟
وزغاريد الطيور ايفرن الدولاب
وعيون الاحبه اتراقب من ابعيد
تتناشد الوادم وبكلبهه الخوف
تتنطر ابشاره وكلهه رفعت ايد
ومهامس حجيهه وناس تردم ناس
وجفوف القهر ماترضه عنه اتحيد
باجر عيد ...؟
اظل ارسم صور للفرح والاحزان
تواسيني الدموع ونار كلبي اتزيد
لعيون الشمس نحلم نصير ارموش
وباب الحلم وكفنه جرح امجيد
باجر عيد ...؟
ياعيد اللفانه ومالكانه ابضيم ؟
حصتنه الهظم غيرهشنريد انصيد؟؟
يدروب الزغار الفرح اذكر بيج
وبيج اذكر الملكه والمواعيد
وديلاب الهوه وذيج المراجيح
وزغارج بلابل حلوة التغريد
باجر عيد ...؟
بعد بيج المحنه وبالفرح تزهين ؟؟؟
وبعدهه اطيور بغصانج طواريد ؟؟
لو طبعج تبدل مثل حال الناس
من ضكهم العوز امسو عرابيد
باجر عيد ...؟
شفت الناس تحجي وراس يخبط راس
كلتلهم عليمن ؟؟؟؟؟
كالولي باجر عيد !!!!!!!

مما راق لي